Maqedonia e Veriut drejt udhëtimit në SHBA pa viza, pjesë e Dialogut Strategjik

Qytetarët e Maqedonisë së Veriut mund të udhëtojnë në të ardhmen në SHBA pa viza, vetëm me pasaportë, nëse realizohet një nga objektivat e Dialogut Strategjik mes dy vendeve. Ky proces është ende në fazë diskutimi dhe konsiderohet afatgjatë, përcjell albinfo.ch.

Heqja e vizave është një nga temat e rëndësishme të Dialogut Strategjik të nisur në qershor 2022, që synon thellimin e bashkëpunimit në fusha si mbrojtja, energjia, sundimi i ligjit, tregtia dhe kultura. Maqedonia e Veriut është vendi i parë nga Ballkani Perëndimor që ka nisur një dialog të tillë me SHBA-në.

Ministria e Punëve të Jashtme dhe Tregtisë e Maqedonisë së Veriut koordinon procesin dhe thekson se SHBA-ja e sheh vendin si një partnere të besueshme. Bashkëpunimi në mbrojtje përfshin modernizimin e poligonit ushtarak Krivollak dhe mbështetjen për objektivat e NATO-s.

Po ashtu, SHBA ka investuar mbi 500 milionë dollarë në luftën kundër korrupsionit në vend, përmes trajnimeve dhe forcimit të institucioneve.

Në fushën e energjisë, kulturës dhe tregtisë, po punohet për projekte që synojnë rritjen e qëndrueshmërisë dhe shkëmbimeve mes dy vendeve.

Maqedonia e Veriut dhe SHBA këtë vit shënojnë 30 vjet marrëdhënie diplomatike, ndërsa Dialogu Strategjik shihet si një njohje konkrete e partneritetit dhe rolit stabilizues të vendit në rajon.