Një në çdo 100 vdekje në botë shkaktohet nga vetëvrasja

Organizata Botërore e Shëndetësisë (OBSH) ka paralajmëruar për një krizë në rritje të shëndetit mendor, duke theksuar se më shumë se një në çdo 100 vdekje globalisht është pasojë e vetëvrasjes.

Në vitin 2021 u regjistruan rreth 727 mijë vetëvrasje në botë. Për çdo rast fatal ka rreth 20 tentativa, sipas OBSH-së. Tek të rinjtë, vetëvrasja është një nga shkaqet kryesore të vdekjeve: shkaku i dytë për vajzat 15-29 vjeç dhe i treti për djemtë në këtë moshë, përcjell albinfo.ch

Megjithëse normat globale të vetëvrasjeve kanë rënë për 35% mes viteve 2000 dhe 2021, progresi është shumë më i ngadaltë se objektivat e vendosura. Në Amerikë, përkundrazi, rastet janë rritur me 17%.

OBSH paralajmëron se më shumë se një miliard njerëz sot jetojnë me çrregullime të shëndetit mendor, ndërsa investimet shtetërore në këtë fushë mbeten të ulëta – mesatarisht vetëm 2% e buxheteve shëndetësore.

Në Kosovë, ndihmë ofrohet nga Linja e Jetës në numrin 0800 12345 (10:00 – 02:00), për ata që përballen me mendime për vetëvrasje, depresion ose ankth.