Austri: Mediat sociale vetëm për përdorues mbi 15 vjeç

Pixabay

Sekretari i Shtetit për Sigurinë e Shtetit në Austri, Jörg Leichtfried, ka dalë në mbrojtje të ligjit të ri për mbikëqyrjen e shërbimeve të mesazheve, i miratuar një javë më parë nga Këshilli Kombëtar, pavarësisht kritikave të ashpra nga avokatët e mbrojtjes së të dhënave dhe opozita, shkruan ORF, transmeton albinfo.ch.

Leichtfried hodhi poshtë pretendimet se ligji krijon boshllëqe në mbrojtjen e të dhënave dhe sigurinë, duke theksuar se “boshllëqet nuk janë përgjegjësi e shtetit”, por vendim i vështirë i politikës, që synon luftimin e kërcënimeve të sigurisë.

Në një intervistë për APA, ai gjithashtu u ndal tek çështja e kufizimit të moshës për përdorimin e rrjeteve sociale, temë që u përforcua pas ngjarjeve të dhunshme në një shkollë në Graz. Leichtfried deklaroi se dëshiron të shohë një kufi moshe prej 15 vjetësh për aksesin në mediat sociale në Austri, të implementuar deri në fund të vitit, duke theksuar se një rregullore e BE-së do të ishte më efektive për shkak të fushëveprimit më të gjerë.

Në lidhje me propozimet për zgjerimin e mbikëqyrjes, përfshirë krimet e lidhura me drogën, Sekretari i Shtetit tha se për momentin nuk parashikohet një ndryshim i tillë dhe se nuk është çështje që do të trajtohet në pesë vitet e ardhshme, transmeton albinfo.ch.

Nga ana tjetër, avokatët e mbrojtjes së të dhënave kanë shprehur shqetësime serioze, duke paralajmëruar se është pothuajse e pamundur të kufizohet mbikëqyrja e aplikacioneve si Telegram dhe WhatsApp pa krijuar “Trojanë federalë” që do të lejonin akses të plotë në pajisjet e përdoruesve — një qasje e kritikuar edhe më parë dhe rrëzuar nga Gjykata Kushtetuese në 2019.

Leichtfried u shpreh i bindur se në Austri nuk do të ndodhin abuzime si ato të raportuara në vende të tjera si Spanja, Polonia dhe Greqia, ku softuerë përgjuese përdoren për monitorimin e gazetarëve dhe opozitës. Ai theksoi se vendi ka “nivelin më të lartë të mbrojtjes ligjore kundër abuzimeve” dhe se zyrtari përgjegjës për mbrojtjen ligjore do të përfshihet në procesin e prokurimit të softuerit për monitorim, transmeton albinfo.ch.