Serbët bllokojnë rrugën nga Rashka drejt Jarinjës, qarkullimi në kufirin me Kosovën thuajse është ndërprerë

Disa qytetarë serbë kanë bllokuar rrugën kryesore që lidh Rashkën me Jarinjën, duke shkaktuar ndalesa të mëdha në qarkullimin e automjeteve drejt kufirit me Kosovën. Sipas raportimeve nga Qendra Kombëtare për Menaxhim Kufitar, trafiku në këtë pjesë është reduktuar ndjeshëm, përcjell albinfo.ch.

Në një komunikatë zyrtare theksohet se në hyrje të Kosovës numri i automjeteve është shumë i ulët për shkak të bllokadës. Autoritetet monitorojnë situatën dhe premtojnë të informojnë publikun për çdo ndryshim.

Kjo nuk është hera e parë që protestuesit serbë ndërmarrin masa të tilla; më parë ata kanë bllokuar edhe pikën kufitare në Merdarë. Ndërkohë, në Serbi po vazhdojnë protestat kundër qeverisë, të nxitura nga incidentet e fundit në Novi Sad.