Zhduket një 13-vjeçare nga Kosova në Gjermani, policia gjermane dhe familja kërkojnë ndihmën e qytetarëve

Një vajzë 13-vjeçare me origjinë nga Istogu, e identifikuar si Arta Hajzeraj, është raportuar e zhdukur që nga data 27 qershor në qytetin Zwickau të Gjermanisë. Zhdukja e saj ka ndodhur në zonën “Lothar-Streit-Straße”, ku ajo banon me familjen e saj, shkruan Klan Kosova, transmeton albinfo.ch.

Sipas familjarëve, Arta kishte dalë nga shtëpia për në shkollë në orën 07:00 si zakonisht, por kontakti me të është humbur që nga ora 10:00 e paradites së asaj dite. Klankosova.tv raporton se daja i saj në Kosovë ka konfirmuar këtë informacion dhe është i shqetësuar për fatin e mbesës së tij.

Policia gjermane ka nisur menjëherë kërkimet dhe ka publikuar përshkrimin e vajzës në përpjekje për të mbledhur informacione nga qytetarët. Në ditën e zhdukjes, Arta kishte të veshur xhinse blu të çelët, një bluzë të zezë të markës Adidas dhe mbante me vete një çantë shpine të markës Nike.

Në të njëjtën zonë dhe pothuajse në të njëjtën kohë është raportuar e zhdukur edhe një tjetër vajzë 13-vjeçare, e identifikuar si Sahar N. Autoritetet gjermane po hetojnë mundësinë që të dyja vajzat të kenë qenë bashkë në momentin e zhdukjes, por kjo ende nuk është konfirmuar.

Policia e Zwickau ka bërë thirrje publike për ndihmë dhe ka vendosur një numër kontakti për këdo që mund të ketë informacione: 0375 428102. Ndërkohë, edhe familja e Artës në Gjermani ka vënë në dispozicion numrin 015754145810 për çdo lajm që mund të ndihmojë në gjetjen e saj, transmeton albinfo.ch.