Qeveria austriake po shqyrton ndërhyrjen në çmimet e energjisë

(KEYSTONE/DPA/Patrick Pleul)

Për shkak të pasigurisë së rritur në Lindjen e Mesme dhe frikës për rritje të mëtejshme të çmimeve të energjisë, qeveria e Austrisë po shqyrton mundësinë e vendosjes së rregulloreve ligjore që të frenojnë këto rritje, shkruan ORF, transmeton albinfo.ch.

Zëvendëskancelari dhe kreu i Partisë Socialdemokrate, Andreas Babler, deklaroi se vendi ka nevojë për një mekanizëm krize që e mbron Austrinë nga çmimet e larta të energjisë. Babler theksoi se nuk duhet të përsëriten gabimet e së kaluarës, duke iu referuar rritjeve të mëdha të çmimeve pas luftës në Ukrainë, që sollën edhe fitime të konsiderueshme për kompanitë e energjisë. Qëllimi është krijimi i një ligji në interes të klientëve, shtetit dhe ekonomisë austriake, ndërsa detajet janë ende në negociata.

Sipas raportimeve, edhe kancelari Christian Stocker i ÖVP-së konsideron ndërhyrjet në çmime si një mundësi të diskutueshme, veçanërisht në rast të rritjeve ose tronditjeve të ndjeshme të çmimeve, transmeton albinfo.ch.

Megjithatë, partia më e vogël në koalicion, NEOS, theksoi se nuk ka ende diskutime konkrete për ndryshime ligjore dhe se prioritet mbeten masat e planifikuara për promovimin e ngrohjes dhe energjisë së rinovueshme.

Nga ana tjetër, Wolfgang Urbantschitsch nga E-Control siguroi se rritjet e fundit të çmimeve të gazit, pas sulmit ndaj Iranit, nuk do të ndikojnë menjëherë në faturat e familjeve. Ai theksoi se vetëm nëse çmimet mbeten të larta për një periudhë më të gjatë, atëherë do të ketë pasoja të dukshme. Sipas tij, zgjidhja qëndron në uljen e varësisë nga burimet e jashtme të energjisë, përmes rritjes së pavarësisë energjetike.

Aktualisht, Austria ka mbushur magazinat e saj të gazit natyror me rreth 60 teravat orë, që është afërsisht konsumi vjetor i vendit, duke u përgatitur për periudha të pasigurta energjetike, transmeton albinfo.ch.