Gjermani: Aksident pasi minibusi doli nga rruga dhe u përmbys, 3 shqiptarë të vdekur

Foto sc

Në Koblenz të Gjermanisë, mëngjesin e sotëm ka ndodhur një aksident tragjik, si pasojë e të cilit kanë vdekur 3 shqiptarë dhe janë lënduar disa të tjerë.

Viktimat janë një burrë 53-vjeçar dhe dy gra, të moshës 47 dhe 65 vjeç. Raportimet tregojnë se ata, së bashku me 6 persona të tjerë mes moshës 20 dhe 66 vjeç, po ktheheshin nga një festë familjare në Hesse, raporton Bild.

Autoritetet kanë njoftuar se aksidenti ndodhi rreth orës 3:05 të mëngjesit, teksa gjetjet fillestare tregojnë se një minibus me nëntë vende doli nga rruga dhe u përmbys. Në aksident nuk u përfshinë automjete të tjera, sipas policisë gjermane. Megjithatë, një makinë tjetër kaloi mbi “rrënoja” pas aksidentit, transmeton albinfo.ch.

Shkaku i aksidentit mbetet i paqartë. Identitetet e disa prej personave në minibus ende nuk janë gjetur. Policia tha se përveç shqiptarëve në automjet kishte edhe shtetas të huaj.

Autostrada fillimisht u mbyll plotësisht midis Koblenzit dhe Ochtendungut herët këtë mëngjes, pasi operacionet e shpëtimit zgjatën me orë të tëra.