Ministri gjerman zbulon hollësi të trajtimit të veçantë të refugjatëve ballkanikë

Ndër hollësitë që ai i ka zbuluar sot është se në të ardhmen refugjatët nga Ballkani perëndimor nuk do të shpërndahen në të gjitha njësitë federale por vetëm në disa prej tyre

Ministri gjerman i punëve të brendshme Thomas De Maizière u ka bërë të ditur sot landeve gjermane (njësive federale) hollësitë lidhur me trajtimin e veçantë të azilkërkuesve nga Ballkani. “Është e papranueshme që gjysma e të gjithë azilkërkuesve në Gjermani të vijnë nga vendet e Ballkanit Perëndimor” ka thënë ai, prandaj nevojitet një trajtim më i shpejtë dhe më pak burokratik tyre.

Ndër hollësitë që ai i ka zbuluar sot është se në të ardhmen refugjatët nga Ballkani perëndimor nuk do të shpërndahen në të gjitha njësitë federale por vetëm në disa prej tyre, shkruan donaukurier.de. Pastaj, procedurat e tyre do të shpejtohen aq shumë sa që, mundësisht do te reduktohen në vetëm disa javë, ka thënë de Maiziere.

Ndërsa pas refuzimit, azilkërkuesit duhet të udhëtojnë sa më shpejtë nga kanë ardhur dhe në rast nevoje, do të deportohen, transmeton albinfo.ch. Policia Federale, sipas tij do të marrë përgjegjësinë kryesore për dëbimin e azilkërkuesve nga Ballkani Perëndimor. Për këto veprime nuk nevojitet ndryshimi i ligjit, u ka thënë ministri përfaqësuesve të landeve.

Ashpërsimi i qëndrimit ndaj kësaj kategorie azilkërkuesish bëhet sipas Maiziere për të liruar kapacitetet për refugjatët që vijnë nga vendet me luftë civile.
Ndërsa kryetari i bashkësisë së qyteteve dhe komunave gjermane Gerd Landsberg ka thënë se është e domosdoshme që refugjatët të cilët nuk kanë gjasa për azil të mbeten në qendrat e pranimit dhe të mos transferohen fare nëpër komuna.