Arrestohet kosovari: Po kontrabandonte 19 skuterë në Ticino

Gjatë një kontrolli të bërë në Ticino, zyrtarë nga Zyra Federale për Doganat dhe Sigurinë Kufitare kanë ndaluar një kamion dërgesash, ku ishin ngarkuar 19 skuterë. Këto automjete nuk ishin zhdoganuar siç duhet, transmeton albinfo.ch.

Zyra Federale e Doganave dhe Sigurisë Kufitare (BAZG) njoftoi të premten se targat u ishin hequr dhe pas restaurimit, ato ishin menduar për rishitje në territorin e Zvicrës, shkruan sda.ch.

Arrestimi u bë javën e kaluar në autostradën në Ticino ndërsa kamioni shkonte drejt veriut, në një zonë pushimi midis Riva San Vitale dhe Capolago, vazhdon komunikata.

Malli (mopedët) tashmë ishte refuzuar në pikën kufitare Pizzamiglio në të njëjtën ditë, sepse konsiderohej mall komercial.

Mirëpo, shoferi, një shtetas kosovar 43-vjeçar, nuk i ka zbatuar udhëzimet e zyrtarëve dhe është futur sërish në Zvicër, përcjell albinfo.ch. Kështu, ai tani duhej të paguante një gjobë prej disa mijëra frangash dhe të deklaronte mallin sipas rregullave.