Shet kokainë me vlerë prej 2.5 milionë frangash: 16 vjet burg për shqiptarin

Një shtetas shqiptar ka shitur 52 kilogramë kokainë në Aargau brneda vetëm gjashtë muajsh. Tani ai duhet të mbajë 16 vjet burg

Një njeri familjar dhe punëtor, në dukje i zakonshëm bënte një jetë të dyfishtë si bos droge. Shtetasi i Shqipërisë, rreth të dyzetave, jetonte me modesti në një apartament me tri dhoma, në periferi të Lenzburgut AG.

Ai ishte gjithmonë një person që nuk binte në sy dhe i kujdesshëm, transmeton albinfo.ch. Por pas kësaj fasade fshihej një sekret i madh.

Në vetëm gjashtë muaj ai ka shitur 52 kilogramë kokainë dhe tetë kilogramë heroinë në Kantonin Aargau, shkruan gazeta Aargauer Zeitung. Shitjet kishin arritur shumën prej më shumë se 2.5 milionë franga.

Hetuesit i ranë atij në gjurmë përmes një telefoni celular të konfiskuar kripto. Këto pajisje nga Sky Global mundësojnë komunikim të koduar – veçanërisht për qëllime kriminale.

Europoli ja ka dalë të deshifrojë bisedat. Kjo i dha Policisë Kantonale të Aargaut qasje në mesazhet inkriminuese të bosit të drogës. U gjetën fotografi të parave të gatshme dhe udhëzime të hollësishme për dërgesat e drogës.

Hetuesit kanë arritur të lidhin të akuzuarin me emrin e përdoruesit “TP46MT”. Paralelet mes mesazheve të bisedës dhe jetës së tij konfirmuan dyshimin.

I pandehuri ka heshtur gjithë kohës për akuzat në gjykatë. Avokati i tij mbrojtës ka argumentuar se bisedat në celular nuk mund të përdoreshin si provë, përcjell albinfo.ch. Prandaj ai ka kërkuar lirim nga akuza dhe dëmshpërblim për klientin e tij.

Megjithatë, sipas “Aargauer Zeitung”, gjykata e qarkut të Lenzburgut ndoqi zyrën e prokurorit publik.

Ai e dënoi burrin me 16 vjet burg dhe 15 vjet dëbim nga vendi.

---