Integrimi

“Besa“, përmbyllje me dinjitet e një projekti të madh

Me një pritje në rezidencën e ambasadorit të Izraelit, në Bernë është shënuar përmbyllja e projektit “Besa“, që është realizuar gjatë më shumë se një viti përmes ekspozitës shëtitëse të fotografive në shumë qytete të Zvicrës

E mërkurë, 22 Prill 2015 - 10:18 B.SH.

  • albinfo.ch

  • albinfo.ch

  • albinfo.ch

  • albinfo.ch

  • albinfo.ch

  • albinfo.ch

  • albinfo.ch

  • albinfo.ch

 Në maj të vitit të kaluar me hapjen e ekspozitës së parë, në Bazel, pati filluar rrugëtimi i gjatë dhe me shumë stacione i ekspozitës shëtitëse të fotografive “Besa”.

Të hënën, më 20 prill, ekipi i vyeshëm i këtij projekti përmasash të mëdha ka bërë rikapitulimin e kësaj pune përmes një pritjeje jozyrtare të mbajture në rezidencën e ambasadorit të Izraelit, në Bernë. Të ftuar ishin të gjithë ata që kanë kontribuuar për organizimin e projektit dhe që kanë përcjellë gjithë zhvillimin e tij.

Promovimi i vlerave si bashkëjetesa në mes të popujve e religjioneve të ndryshme ka qenë në fokus të këtij projekti dhe në këtë drejtim si shembull konkret ka shërbyer shpëtimi i mijëra hebrenjve nga ndjekja e nazistëve, shpëtim që u bë i mundur falë një kodi të lashtë dhe ende aktiv të shqiptarëve, kodit të fjalës së dhënë, Besës. Me titullin “Besa” tashmë në vende të ndryshme të botës ka shëtitur ekspozita e fotografive të realizuara nga fotografisti i njohur amerikan Norman Gerschwin. Ai ka bërë portretet e disa nga njerëzit që kanë shpëtuar hebrenjtë në Shqipëri ose të pasardhësve të tyre, të cilët përcjellin mesazhin e madh të Besës.
Ndryshe nga ekspozitat e veçanta të realizuara në disa vende tjera, seria e tyre në Zvicër ka qenë fryt i një projekti më të sistemuar dhe të zhvilluar në vazhdimësi, që ka kërkuar një punë kolosale të ekipit realizues. Kjo u potencua edhe nga folësit në pritjen e mbajtur në Bernë, si autori Gerschwin i cili u paraqit përmes videos nga SHBA ashtu dhe nga e bija e tij që ishte e pranishme në këtë pritje dhe të tjerët.
Krahas nikoqirit, ambasadorit izraelit Yigal Caspi, të pranishëm ishin edhe ambasadori i Shqipërisë, Ilir Gjoni dhe ai i Kosovës, Naim Malaj, të cilët kanë qenë të përfshirë në këtë projekt që nga fillimi. Po ashtu kanë marrë pjesë edhe përfaqësuesit e Kuvendit Shqiptar në Zvicër dhe një grup studentësh shqiptarë të Friburgut.
Ndonëse vetë seria e ekspozitave kishte filluar në maj të vitit të kaluar, siç u përmend edhe këtu, aktivitetet mjaft komplekse të realizimit të saj datojnë së paku një vit më parë. Dhe, këtë rrjedhë aktivitetesh e ka shoqëruar hap pas hapi edhe albinfo.ch, që hyn në mesin e bashkorganizatorëve si një partner serioz medial. Duke prezantuar bilancin e projektit, në fillim të fjalës së saj anëtarja e komitetit organizativ Sandra Hoffmann i drejtoi një falënderim platformës albinfo.ch.
Edhe anëtarja tjetër, Esther Hörnlimann ka bërë një bilanc të projektit me ç`rast ka shprehur kënaqësinë për përkrahjen e gjerë që ka gëzuar projekti nga institucione, shoqata, biznese zvicerane, shqiptare, hebrenje e të tjera në Zvicër. Gjatë harkut kohor prej një viti, në ekspozitat dhe aktivitetet përcjellëse kanë defiluar me dhjetëra folës, politikanë, profesorë universitetesh, veprimtarë, artistë dhe kontribuues tjerë përfshirë edhe njerëz që kanë përjetuar ndihmën e shqiptarëve gjatë Luftës së Dytë Botërore dhe pjesëtarë familjesh shpëtimtare 14 ekspozita në po kaq qytete të Zvicrës, me rreth 60 aktivitete shoqëruese janë bërë të mundura vetëm falë një pune të përkushtuar vullnetare të qindra personave nga komuniteti shqiptar dhe të tjerë. Një numër firmash po ashtu kanë dhënë kontributin e tyre të madh në realizimin e këtij projekti dhe këtu vlerësohet në veçanti kontributi i Jahor Jacklrlin, pronar i kompanisë Fruitcake, i cili njëkohësisht ka qenë ndër anëtarët më aktivë në stafin që ka organizuar gjithë aktivitetin. Po ashtu Rexhep Berisha, importues i Birra Peja, ka qenë i pranishëm me produktet e tij nga Kosova gjatë gjithë kohës dhe për këtë u falënderua përzemërsisht nga organizatorët.  
Ambasadori izraelit: Shqiptarët mund të krenohen me atë që kanë bërë për hebrenjtë
“Ka qenë e madhërishme të shihet se marrëdhëniet në mes të hebrenjve dhe myslimanëve nuk kanë qenë gjithmonë vetëm marrëdhënie dhune e konflikti por edhe marrëdhënie miqësore. Kjo dëshmohet nga ajo që kanë bërë shqiptarët gjatë Luftës së Dytë Botërore duke shpëtuar hebrenjtë nga persekutimi dhe vdekja”, ka thënë për albinfo.ch ambasadori izraelit Yigal Caspi. Për këtë, shqiptarët duhet të jenë krenarë dhe ne e admirojmë këtë vepër të tyre të realizuar në rrethanat e luftës dhe shkatërrimit që mbretëronin atëbotë në Evropë”, ka shtuar ai. Ndërsa plotësimit nga ana e albinfo.ch se ky solidarizim dhe kodi i Besës kanë karakterizuar shqiptarët e të gjitha besimeve, Caspi i është përgjigjur: “sigurisht, ashtu është, ka pasur edhe shqiptarë të besimit katolik dhe ortodoks që kane shpëtuar hebrenjtë. Por ajo që bie në sy në konstelacionin e konflikteve aktuale dhe të trashëguara në mes të hebrenjve dhe myslimanëve është ndihma e dhëne nga myslimanët, në këtë rast nga shqiptarët e besimit mysliman. “Askush nuk do të mendonte që myslimanët të kenë shpëtuar hebrenjtë dhe këtu është poenta”, ka përfunduar Caspi. 

 Të tjera nga Integrimi

Pulmologu shqiptar realizoi ëndrrën në Austri: Dr. Mefail Muji hap ordinancën e tij në Vjenë

 E-Diaspora

 Jeta në Austri