Bora ‘paralizon’ disa aeroporte në Britani, çrregullon edhe disa linja të trenit

Aeroportet e Manchesterit, ai “John Lennon” i Liverpoolit dhe ai i Birminghamit kanë mbyllur pistat e tyre pas borës së madhe që ka rënë gjatë natës.

Autoritetet kanë bërë të ditur se po punohet për të rikthyer funksionimin e tyre “sa më shpejt të jetë e mundur”, raporton BBC.

Temperaturat sipas autoriteteve kanë rënë në -11 gradë celsius gjatë natës në Loch Glascarnoch dhe Skoci, pasi disa pjesë të Mbretërisë së Bashkuar po përjetojnë ndërprerje të energjisë pas borës së madhe.

Një alarm për mot të ashpër është lëshuar pasi 25 cm borë mund të bjerë në disa pjesë të Anglisë veriore, sipas National Highways.

Përveç udhëtimit ajror, pasagjerët që udhëtojnë me tren gjatë ditës së diele mund të kenë gjithashtu ndërprerje dhe vonesa, ka bërë të ditur National Rail.