Kosovë: Reduktimet e energjisë elektrike do të vazhdojnë edhe javën e ardhshme

(KEYSTONE/Christian Beutler)

Rajone të Kosovës pritet të përballen me ndërprerje të energjisë elektrike edhe gjatë javës së ardhshme.

Këtë e ka paralajmëruar kryeshefi i KOSTT-it, Evetar Zeqiri.

“Sistemi elektroenergjetik është duke u përballur me ngarkesë të jashtëzakonshme si rezultat i zhvillimit ekonomik që ka ndodhur në vitet e fundit, si rezultat i kërkesës për energji gjithnjë në rritje, si rezultat i elektrifikimit të ekonomive tonë të bizneseve e familjeve…Problemi është i përkohshëm, pra vetëm në këtë javë dhe javën tjetër”, tha Zeqiri.

Ministrja Artane Rizvanolli, kërkoi nga KOSTT-i dhe KEDS-i angazhim maksimal për furnizim të rregullt me energji elektrike dhe adresimin e problemeve në rrjetin energjetik.

“Duhet ta keni parasysh që numri i ndërtimeve të reja, numri i konsumatorëve të rinj në Kosovë në vitet e fundit ka qenë tejet i lartë, 60 mijë amvisëri të reja janë kyçur në sistem përgjatë tri viteve të fundit dhe 8500 biznese do të thotë diku 69 mijë konsumatorë të rinj i kemi vetëm përgjatë tri viteve të fundit”, tha ministrja Rizvanolli.