Abdixhiku në Vjenë: Mbrëmje si kjo janë dëshmi se ndryshimi është afër

Foto FB: Lumir Abdixhiku

Kandidati i Lidhjes Demokratike të Kosovës për kryeministër, Lumir Abdixhiku, është takuar me bashkatdhetarët në Vjenë.

Përmes një postimi në rrjetin social “Facebook”, Abdixhiku ka shkruar se “Turneu i Ndryshimit” po vazhdon ta dëshmojë momentumin e jashtëzakonshëm të Lidhjes Demokratike të Kosovës brenda dhe jashtë vendit, transmeton albinfo.at.

“Pas mbështetjes së madhe në tubimet e ndryshimit, sonte ndaluam në Vjenë. Aty bashkatdhetarët tanë na pritën me një pjesëmarrje mbresëlënëse dhe me entuziazmin e flaktë që e reflekton dashurinë dhe përkushtimin e tyre për Kosovën. Mbrëmje si kjo janë dëshmi se ndryshimi është afër, dhe se Lidhja jonë po forcohet çdo ditë e më shumë kudo që rreh zemra e atyre që ja duan të mirën atdheut. Vizioni ynë për një Kosovë të zhvilluar e të drejtë ku rinia i jetëson ëndrrat dhe e ndërton të ardhmen, ku çdo profesionist ndjehet i përmbushur, dhe ku çdo familje e çdo qytetar e jeton jetën me mirëqenie e dinjitet, nuk mund të realizohet pa përbashkimin tonë të madh në Kosovë e mërgatë! Jemi popull i vogël për të përjetuar kaq urrejtje, ndarje e përçarje. Jemi vend me shumë mundësi për të bërë të ardhmen tonë siç e meritojmë! Të barabartë mes kombeve evropiane! Do ta bëjmë! Bëhu Ndryshimi! “Faleminderit Vjenë! Pritja e bashkatdhetarëve këtu, mbështetje për ndryshim në shkurt! Ndryshimi po vjen!”, ka shkruar ai.