Stuhia “Niklas” merr viktimën e parë

Një person 75 vjeçar nga Andelfingeni ka humbur jetën në veturën e tij pasi që një pemë e rrëzuar nga era është përplasur mbi të

Moti i ligë me erëra të fuqishme ka vazhduar gjithë ditën dhe natën e 31 marsit në pjesën më të madhe të Zvicrës.

Pas dëmeve të shumta të shkaktuara gjithandej dhe lëndimit të disa personave, mbrëmjen e të martës është raportuar edhe rasti i parë i vdekjes si pasojë i stuhisë “Niklas”. Një person 75 vjeçar nga Andelfingeni ka humbur jetën në veturën e tij pasi që një pemë e rrëzuar nga era është përplasur mbi të. Ai po udhëtonte me makinë në rrugën përgjatë një pylli në momentin kur druri i rrëzuar ka goditur pikërisht atë.

Rrëzimi i drurëve ose edhe i gjësendeve tjera ka qenë shkak edhe për lëndimin e një numri personash në regjione të ndryshme të Zvicrës.

Pasditen e të martës shpejtësia e regjistruar e erës në Zvicrën Qendrore ka arritur deri në 120 kilometra në orë. Policisë i janë paraqitur rreth 200 njoftime për dëme të shkaktuara nga era.

Për shkak të rrezikut nga era e fuqishme, në Zvicrën Qendrore kanë ndërprerë punën disa linja hekurudhore malore dhe teleferikë.

Ndërsa në Bazel ka pasur edhe ndërprerje të qarkullimit të tramvajeve. Në Cyrih stuhia ka rrëzuar gjysmën e kulmit prej bakri të një kishe. Për fat të mirë, kjo ka kaluar pa pasoja në njerëz.