Pse udhëtarët në Zvicër mund të paguajnë për kilometër në të ardhmen?

Kompanitë e transportit publik në Zvicër dëshirojnë të përmirësojnë sistemin aktual të tarifave, duke i bazuar çmimet në distancën e përshkuar. A do të përfitonin udhëtarët prej tij?

Tani për tani, udhëtarët në Zvicër blejnë bileta bazuar në distancën shumë të përgjithshme që udhëtojnë, ose në bazë të zonave të udhëtimit.

Kjo mund të mos jetë gjithmonë në avantazhin e tyre, pasi distanca aktuale që ata mbulojnë mund të jetë më e shkurtër se zona për të cilën kanë paguar.

Por kjo mund të ndryshojë me prezantimin e konceptit të ri “MyRide”.

Çfarë është ky sistem?

E nisur nga SwissPass Alliance, organizata ombrellë që bashkon 250 kompani transporti në Zvicër, skema do t’u kërkonte pasagjerëve të paguajnë vetëm për distancën e përshkuar me kilometra – jo më shumë ose më pak.

Qëllimi i këtij sistemi është të lehtësojë udhëtimin për udhëtarët, tha organizata në një deklaratë për shtyp.

Për këtë qëllim, SwissPass Alliance e ka vënë këtë ide në një provë ‘në terren’, për të parë se si përkthehet nga teoria në praktikë, transmeton albinfo.ch.

Që nga maji i këtij viti, 3000 klientë kanë testuar këtë sistem të ri të çmimeve si pjesë e projektit myRIDE.

Si do të funksiononte?

Në vend të zonave ose tarifave të paracaktuara, llogariten distancat e udhëtuara në të vërtetë.

Personat që marrin pjesë në test nuk duhet të zgjedhin paraprakisht një lloj të caktuar abonimi, por thjesht mund të hipin në një tren, autobus ose çdo formë tjetër transporti sa herë të duan dhe të marrin automatikisht biletën e duhur.

“Përveç kësaj, përdoruesit përfitojnë nga transparenca e plotë e kostos në çdo kohë: sistemi i ri tregon çmimin e rrugës së zgjedhur ose të përfunduar para dhe pas udhëtimit,” sipas SwissPass Alliance.

Cili është reagimi nga përdoruesit?

“Anketat e klientëve treguan një vlerësim të përgjithshëm pozitiv dhe normat e rekomandimit për sistemin e ri janë të kënaqshme,” tha organizata.

Por ky mendim nuk ndahet nga të gjithë.

Grupet e konsumatorëve janë ndër kritikët e këtij sistemi, dhe veçanërisht në lidhje me “digjitalizimin” e tij, shkruan thelocal.

“Problemi themelor me projektin është i qartë,” tha shoqata e konsumatorëve Konsumentenschutz. “Pagesa digjitale mund të përdoret vetëm me një telefon celular dhe një funksion gjurmimi.”

Megjithatë, “deri më tani, nuk është paraqitur asnjë zgjidhje që njerëzit pa një smartphone dhe një mjet digjital pagese të mund të përdorin sistemin e ri”.

Si përgjigje, SwissPass Alliance theksoi se modeli i ri MyRide nuk synon të zëvendësojë sistemin aktual të blerjes së biletave, por të ofrojë një mundësi tjetër për ata që e dëshirojnë atë.

Kur mund të zbatohet ky sistem?

Përpara se të mund të lançohet, duhet bërë disa punë shtesë, tha Aleanca SwissPas – për shembull konsultime dhe reagime nga të gjitha palët e përfshira në projekt.

Organizata do të vendosë vitin e ardhshëm se kur do të nisë sistemin e ri; tani për tani është duke e planifikuar për vitin 2026.

---