Ukraina ka sulmuar Rusinë me raketat amerikane me rreze të gjatë

Foto nga arkiva Keystone EPA/JIM HOLLANDER

Ukraina ka përdorur Sistemin Raketor Taktik të Ushtrisë (ATACMS) në sulmin në rajonin rus, Bryansk, këtë mëngjes, ka thënë Ministria ruse e Mbrojtjes në Moskë.

Sipas njoftimit, Ukraina ka lëshuar raketa amerikane me rreze të gjatë brenda Rusisë për herë të parë të martën, raporton BBC.

Pesë raketa janë rrëzuar dhe një është dëmtuar, mbetjet e së cilës kanë shkaktuar zjarr në objektin ushtarak të rajonit, zjarr i cili është shuar shpejt dhe nuk ka pasur viktima.

Gjatë ditës së sotme ushtria ukrainase ka konfirmuar se ka goditur një magazinë të municioneve në rajonin Bryansk, por nuk ka specifikuar se a janë përdorur ATACMS apo jo, transmeton albinfo.ch.

Ndryshe, dje presidenti rus, Vladimir Putin, miratoi ndryshime në doktrinën bërthamore të Rusisë, duke vendosur kushte të reja, në të cilat Rusia do ta konsideronte përdorimin e arsenalit bërthamor.