Humb jetën në aksident kosovari 19 vjeçar

Një aksident me pasoja fatale për një kosovar 19 vjeçar ka ndodhur mbrëmjen e të premtes në Monthey, Valis.

Pasi që shoferi, për shkaqe ende të panjohura ka humbur kontrollin, automjeti që po e ngiste në rrugët e qytetit Monthey (kantoni Valis) ka rrëshqitur në rrethrrotullimin e një udhëkryqi.  Përplasja e fuqishme ka bërë që automobili i përmbysur nga ana e shoferit, të rrëshqasë në drejtimin e kundërt, prej nga vinin automobilët tjerë. Kështu, një automjet që po vinte në mënyrë të rregullt nga ana tjetër, është përplasur me të parin.

Për pasojë, njëri nga personat që ishte në automjet, një kosovar 19 vjeç me banim në Valis ka humbur jetën.

Personi i dytë, një vendës 17 vjeçar ka pësuar lëndime të rënda dhe është transportuar me helikopter në Klinikën Universitare të Lozanës CHUV.  Vozitësi i automobilit tjetër, një vendës 52 vjeçar ka shpëtuar pa lëndime.

Policia u bën thirrje dëshmitarëve që mund të kenë njohuri lidhur me aksidentin të paraqiten në këtë numër telefoni: 027/326’56’56