Vdes në moshën 106 vjeçare artisti Hans Erni

Ai ka qenë burri më i moçëm në qytetin ku ka jetuar dhe në mesin e ngushtë të personave më të moshuar në gjithë Zvicrën

Keystone

Ka ndërruar jetë të shtunën në Lucern piktori dhe skulptori më i vjetër në Zvicër dhe ndoshta edhe në botë, Hans Erni. Një muaj para se të vdiste, më 21 shkurt, ai kishte mbushur plot 106 vjet, duke qenë kështu burri më i moçëm në qytetin  ku ka jetuar dhe në mesin e ngushtë të personave më të moshuar në gjithë Zvicrën.

Siç ka njoftuar familja e tij, ai ka ikur në paqe, në klinikën Hirslanden në Lucern. Erni, i lindur më 21 shkurt 1909, ka qenë aktiv në krijimtari deri në ditët e fundit para se të vdiste.

Për artistin e madh, i cili me veprën e tij ka shënuar shekullin 20 të artit zviceran e më gjerë, ka folur drejtori i kulturës në Lucern, Reto Wyss i cili ka lavdëruar jo vetëm veprën e madhe artistike të Erni-t por edhe angazhimin e tij të palodhshëm humanitar. Ai ka kujtuar se në ditëlindjen e 105-të të tij, artisti ka qenë në gjendje shumë të kthjellët dhe vitale.

Reputacionin prej piktori të madh Erni e ka fituar në vitin 1939 kur ka marrë detyrën për të pikturuar muralin e madh lushtuar Ekspozitës nacionale  “Landi” që në Zvicër  mbahet një herë në një periudhë prej më shumë se një dekade.

Më vonë, artisti ka pasur probleme me shtetin dhe, për shkak të ideve të tij marksiste është etiketuar edhe si “tradhtar i vendit”. Por më vonë është rehabilituar dhe është vlerësuar me çmimet më të larta të Zvicrës.