Ukraina u godit me mbi 900 bomba brenda një jave, sipas presidentit

EPA/SERGEY DOLZHENKO

Presidenti i Ukrainës, Volodymyr Zelensky, u ka bërë thirrje aleatëve për më shumë ndihmë për të forcuar mbrojtjen ajrore, pas një jave që shteti është përballur me mbi 900 bombardime.

“Mbrëmë, Rusia e ka terrorizuar Ukrainën me mbi 50 sulme me dronë, dhe përgjatë javës ka nisur më shumë se 900 bomba, rreth 30 raketa dhe dronë kamikazë nëpër rajone të ndryshme të Ukrainës”, ka shkruar ai.

Përmes një postimi në rrjetin social “Twitter”, ai ka thënë se infrastruktura civile dhe kritike është shënjestruar më së shumti.

“Të gjitha këto sulme do të ishin të pamundshme nëse do të kishim mbështetje të mjaftueshme nga bota në disa aspekte: kapacitete me rreze të gjata për sigurinë tonë, sanksione realisht efektive për t’i pamundësuar Rusisë importin e materialeve kyçe për dronë dhe prodhim raketash, dhe vendime politike që mund të dëmtojnë vullnetin e Rusisë për të vazhduar këtë luftë”, ka shkruar ai, transmeton albinfo.ch.

Tutje, ai u shpreh se Ukraina meriton sigurinë e njëjtë me atë të partnerëve në botën e lirë.