Sveçla takon të dërguarin gjerman për Ballkanin Perëndimor, flasin për kontrollin e mallrave serbe në Kosovë

Foto: Xhelal Sveçla, FB

Ministri i Punëve të Brendshme në Kosovë, Xhelal Sveçla, ka takuar të dërguarin e Gjermanisë për Ballkanin Perëndimor, Manuel Sarrazin.

Ata kanë diskutuar mbi masën e kontrolleve manuale të sigurisë për mallrat që futen nga Serbia, në pikën kufitare të Merdarit.

Sveçla ka shkruar se ky vendim po zbatohet me përkushtim, me qëllim të sigurisë së vendit “dhe në funksionalizimin e sistemeve të skanerëve ‘X’”.

“Diskutuam për ecurinë e takimit të fundit të Procesit të Berlinit dhe rikonfirmova përkushtimin tonë si palë aktive për angazhim të mëtejmë në kuadër të këtij procesi. Biseduam po ashtu për masën e kontrolleve manuale të sigurisë për mallërat që hyjnë nga Serbia në pikën kufitare në Merdarë. Zyrtarët tanë shtetëror po e zbatojnë këtë vendim me përkushtim me qëllim të garantimit të sigurisë së vendit tonë deri në funksionalizimin e sistemeve të skanerëve ‘X’ që do të lehtësojnë edhe punën e tyre edhe pritjet në pika kufitare. Falënderova z. Sarrazin për angazhimin e tij të vazhdueshëm në avancimin e bashkëpunimit rajonal”, ka thënë ministri i Punëve të Brendshme.

Me qëllim që Kosova të merrte pjesë në takimet e CEFTA-s e të Procesit të Berlinit, institucionet e Kosovës kanë vendosur javë më parë që të lejohet futja e mallrave serbe nëpërmjet pikës kufitare të Merdarit.