Nga 2025 në Kosovë rriten pagat në sektorin publik

@unsplash

Qeveria e Kosovës, me hartimin e projektligjit për Buxhetin e vitit 2025 ka paraparë edhe rritjen e pagave në sektorin publik.

Sipas projektligjit që pritet të miratohet të mërkurën në qeveri, rritja do të bëhet në dy pjesë përgjatë vitit të ardhshëm.

Rritja e parë bëhet në janar në vlerën 55 euro për secilën kategori dhe rritja e dytë do të bëhet në muajin korrik për të njëjtën vlerë.

“Pra, vlera e një koeficienti mbetet 110 euro, mirëpo rritet sasia e koeficientëve për një njësi, duke filluar nga janari i vitit të ardhshëm për 0.5 njësi, pra për gjysmë njësie, dhe pastaj nga korriku i vitit të ardhshëm edhe për 0.5 njësi të tjera. Me fjalë tjera, dikush që e ka koeficientin 5.6, në janar i bëhet 6.1, kurse në korrik koeficienti i bëhet 6.6. Ngjashëm edhe për dikë që ka koeficientin 10.5, nga janari i bëhet 11.0, kurse nga korriku i bëhet 11.5. Shprehur në vlerë monetare, i bie që të gjithë të punësuarit në sektorin publik, pagat për ta do të rriten për 55 euro duke filluar nga janari, dhe për 110 euro nga muaji korrik i vitit të ardhshëm 2025”, ka thënë kryeministri i Kosovës, Albin Kurti.