Dy aksidentet me tre të vdekur në 24 orët e fundit në Kosovë

Policia e Kosovës ka dhënë detaje për dy aksidentet me fatalitet që kanë ndodhur gjatë 24 orëve të fundit në Kosovë, përcjell albinfo.ch.

Një person ka vdekur e një tjetër ka pësuar lëndime trupore si pasojë e një aksidenti në mes dy automjeteve që ka ndodhur dje në rrugën Kamenicë-Gjilan.

 Personi i dyshuar pas trajtimit mjekësor është arrestuar nga Policia e Kosovës.

“I dyshuari mashkull kosovar pas marrjes së ndihmës mjekësore është arrestuar dhe me vendim të prokurorit është dërguar në mbajtje”, thuhet në njoftim.

Tutje bëhet e ditur se me urdhër të prokurorit  trupi i pajetë i viktimës është dërguar në Institutin e Mjekësisë Ligjore(IML) për obduksion.

Ndërsa një aksident tjetër me fatalitet ndodhi të hënën në mbrëmje edhe në autostradën “Dr. Ibrahim Rugova” Prizren.

Si pasojë e aksidentit në mes dy veturave dhe një kamioni kanë vdekur dy persona, ndërsa janë lënduar edhe tre të tjerë.

“Me vendim të prokurorit trupat e pajetë janë dërguar në Institutin e Mjekësisë Ligjore për obduksion”, ka njoftuar Policia e Kosovës.

Tutje u tha se rasti është duke u hetuar. 

Policia e Kosovës ka kërkuar nga të gjithë pjesëmarrësit në trafik, në veçanti shoferët që të kenë kujdes më të shtuar, të respektojnë rregullat dhe shenjat e trafikut rrugor si dhe t’iu përshtaten kushteve të rrugës, për të pasur një siguri më të madhe në trafik dhe për të shmangur rastet e tilla tragjike.