Osmani udhëtoi për vizitë pune në Gjermani, takohet me Presidentin Steinmeier

Presidentja e Kosovës, Vjosa Osmani, ka udhëtuar për vizitë pune në Gjermani. Gjatë kësaj vizite do të ketë takim pune me presidentin e Gjermanisë, Frank Walter- Steinmeier, përcjell albinfo.ch.

Gjithashtu, Osmani do të realizojë takime të ndara me ministra e deputetë gjermanë.

Sipas një njoftimi të zyrës së Presidencës, Osmani do të jetë folëse në sesionin Dialogu i Liderëve në kuadër të Berlin Global Dialogue, me ç’rast do të diskutojë në temën: “Rimendimi i qëndrueshmërisë – përgjigjja ndaj ndryshimeve gjeopolitike”.

Në kuadër të kësaj vizite, presidentja do të marrë pjesë edhe në ceremoninë hapëse të Festivalit Shqiptar të Gastronomisë në Berlin, ku do të mbajë fjalim para pjesëmarrësve.

Ndryshe, Osmani vizitën zyrtare bilaterale në Gjermani, me ftesë të Presidentit Steinemier, e ka realizuar në shtator të vitit 2021, ku është pritur me nderime ushtarake. Pas vizitës zyrtare bilaterale, ajo gjatë kësaj periudhe trevjeçare ka pasur edhe një sërë takimesh pune e telefonata me Presidentin Steinmeier, i cili është përkrahës i fuqishëm i të ardhmes euroatlantike të vendit tonë.