Rasti i vrasjes së një badigardi të një diskoteke me prejardhje nga Mali i Zi, që ka ndodhur në Cyrih më 1 mars, po merr edhe përmasa politike. Mediet kanë zbuluar ndërkohë se i dyshuari për vrasje, Jeton G. me prejardhje nga Kosova, i arrestuar pas disa ditëve të kaluara në arrati, ka jetuar nga ndihmat sociale. Dhe, ka jetuar madje në luks.
Janë publikuar fotografi që ai i kishte postuar në facebook, ku duket në një pishinë të një hoteli të shtrenjtë ose pranë një makine luksoze Jaguar etj.

Siç ka shkruar gazeta “NZZ am Sonntag”, Jeton G., gjatë gjashtë viteve të fundit, së bashku me të shoqen dhe dy fëmijët ka marrë në emër të ndihmave sociale deri në 5000 franga në muaj. Ai ka shtetësinë zvicerane nga viti 2003 dhe jetonte në komunën Regensdorf të Kantonit të Cyrihut. Ndërsa jetën luksoze e financonte edhe me biznese ilegale, veç tjerash, me kultivim të kanabisit.

Këto informacione kanë bërë që partia SVP të kërkojë sqarime dhe të vejë në pyetje edhe njëherë sistemin social të vendit. “Vetëm delikti fatal, vrasja e ka ndërprerë këtë çmendi sociale”, ka thënë kryetari i fraksionit të kësaj partie në Parlamentin e Kantonit të Cyrihut Jürg Trachsel. Ai ka kërkuar masa për të ndryshuar këtë gjendje, veç tjerash hetimin me procedura më të shkurtuara dhe më efikase. Ndërsa sekretari i fraksionit të SP-së, Markus Spath ka thënë se fajtor nuk është ligji dhe as sistemi, por autoritetet sociale të cilat nuk i shfrytëzojnë sanksionet e mundshme.

Nga ana tjetër, deputetja  e SVP-së, Barbara Steinemann, e cila është pjesë e entit social të Regensdorfit, ent i cili është në thumb të kritikës është mbrojtur lidhur me rastin. “Ne në këtë rast kemi bërë gjithë çfarë ka qenë mundur”: Sipas saj, pasi që ndihmat sociale u dedikoheshin edhe gruas dhe fëmijëve, enti social nuk ka pasur mundësi t`ia zbriste ndihmat sociale familjes më shumë se për 15 për qind. “Po të ishte vetëm për Jeton G., si individ, ne me kohë do t`ia ndërprisnim ndihmat”.