Zvicra do të pranojë edhe 3000 refugjatë nga Siria

Ata do të vijnë gjatë tri viteve ndërsa maksimalisht 1000 persona do të vijnë gjatë këtij viti

Foto ilustrim

Zvicra, gjatë tri viteve  të ardhshme do të pranojë për strehim edhe 3000 refugjatë të tjerë lufte nga Siria. Një numër refugjatësh që maksimalisht mund të jetë 1000, do të vijë në Zvicër gjatë këtij viti, ka vendosur Këshilli Federal sot.

Krahas strehimit në Zvicër, për ndihmë në terren shteti zviceran do ta rrisë shumën e ndihmave në 50 milionë franga. Me këto mjete Zvicra do të vazhdojë të realizojë projektet e veta në Siri, në fusha të ndryshme si për shembull në atë të arsimit.

Qeveria e Zvicrës ka marrë këtë vendim si reagim ndaj pasojave shkatërruese të konfliktit në Siri. Llogaritet se janë rreth 16 milionë sirianë që kanë nevojë për t`u ndihmuar.

Që nga shpërthimi i luftës civile në vitin 2011, Këshilli Federal ka miratuar gjithsej 128 milionë franga për ndihma në terren. Për vitin 2015 ishin planifikuar 30 milionë franga ndërsa qeveria, si masë të menjëhershme do ta shtojë këtë shumë edhe për 20 milionë franga të tjera, thuhet në një komunikatë të qeverisë. Gjysma e shumës do të përdoret për popullatën e rekur në Siri dhe gjysma tjetër për ndihmë në vendet fqinje.

Sirianët, pas shtetasve të Eritresë përbëjnë numrin më të madh të refugjatëve në Zvicër. Në muajin janar ndodheshin rreth 7000 shtetas nga Siria në procesin e azilit, ndërsa mbi gjysma e tyre kanë marrë statusin e pranimit të përkohshëm (F).

Në vjeshtë të këtij viti, Qeveria do ta rivlerësojë situatën në konfliktin e Sirisë.

Organizata zvicerane  për ndihmë Refugjatëve “Flüchtlingshilfe” pati kritikuar qeverinë e vendit për pranim të pakët të refugjatëve nga Siria. Ajo kishte kërkuar pranimin e 5000 vetave. Me hapin më të ri të Këshillit Federal edhe kjo organizatë shprehet megjithatë e kënaqur dhe e vlerëson atë si një sinjal të mirë që jep Zvicra  përballë shteteve të Evropës.

Edhe ky vendim nuk ka kaluar pa kundërshtime. Ndërkohë që shumica e partive, para së gjithash ajo socialdemokrate e dhe partia e Gjelbër e kanë përshëndetur, SVP/UDC ka drejtuar kritika të ashpra në adresë të qeverisë. Vendim arbitrar dhe i dëmshëm edhe nga ana financiare për Zvicrën, ka vlerësuar në emrin e SVP, deputeti Hans Fehr. Sipas tij Zvicra edhe pa këtë rritje ndihme dhe kuote të pranimit, ka bërë më shumë se vendet tjera për refugjatët nga Siria.

Partia në fjalë do ta kundërshtojë një vendim të tillë.