Shtetasi turkozviceran mban gruan gjermane peng në Siri

Prokuroria Federale është duke zhvilluar hetime kundër një personi të dyshuar për pjesëmarrje në një organizatë terroriste. Fjala është për një shtetas turkozviceran me banim në Arbon të kantonit Thurgau i cili dyshohet se i është bashkuar në Siri organizatës terroriste Al-Nusra-Front.

Të mërkurën kryeprokurori federal Michael Lauber në emisionin “Rundschau” të Televizionit Publik të Zvicrës SRF ka vërtetuar rezultatet e hulumtimeve që në këtë drejtim kishin bërë gazetarët e SRF dhe “Stutgarter Nachrichten”.

Sipas këtyre hulumtimeve del se personi në fjalë e ka marrë me vete edhe bashkëshorten e tij, një gjermane të konvertuar në islam dhe e ka mbajtur kundër dëshirës së saj në Siri, ku po zhvillohet në luftë brutale civile.

Krahas prokurorisë zvicerane, hetime ndaj personit të përmendur është duke zhvilluar edhe Enti i kriminalistikës i landit Baden-Württemberg.