60-vjeçarja shqiptare lindi binjakë në Austri

Një shqiptare nga Kosova është bërë senzacion në Austri. Në moshën 60-vjeçare ajo ka lindur dy djem binjakë

Një senzacion i vërtetë ka ndodhur në Austri. Të mërkurën në mesditë një nënë shqiptare e moshës 60-vjeçare në klinikën Wels – Grieskirchen ka sjellë në jetë dy djem binjakë, Eldioni dhe Elmedini janë emrat e dy binjakëve, për të cilët po flitet në të gjitha mediet austriake.

Ata janë me shëndet të mire, ashtu siç është edhe nëna e tyre. Kështu gruaja me prejardhje nga Kosova, e cila banon në Wels, është bërë nëna më e vjetër e binjakëve në botë.

“Secili gjinokolog e di se një femër nuk mund të mbetët shtatzënë në formë normale në moshën 60-vjeçare”, ka thënë gjinekologu që ka përcjellë gjendjen e saj, Alfred Bacherer, për gazetat austriake, transmeton albinfo.ch. “Kjo është bërë me ndihmën e dhurimit të vezeve diku jashtë vendit (Austrisë), me sa duket është bërë në Turqi”.

Gruaja dhe burri i saj e kishin një vajzë, por ata dëshironin patjetër të paktën edhe një djalë. “Në atë kohë çifti pati thënë se do të sjellim sërish fëmijë dhe do të jetë djalë”, thotë gjinekologu Bacherer. “Dhe kjo tani është një realitet”.

Megjithatë gjinekologu ka deklaruar se shtatzënia ishte e rrezikshme jo vetëm për shkak të moshës që kishte nëna e binjakëve, por edhe për shkak se ajo vuante nga diabeti dhe anemia. “Kjo shtatzëni nuk ishte aq e lehtë as për ne”.