Zjarr në klubin shqiptar “Dardania”

Klubi në të cilin ka shpërthyer zjarri ishte hapur pak ditë më parë, gjegjësisht në fillim të shkurtit të këtij viti

Pasditen e të premtes ka shpërthyer një zjarr në barin e hapur rishtas “Dardania” në Villmergen të kantonit Aargau.

Bari ose klubi shqiptar ndodhet në zonën industriale të Villmergenit, në një ndërtesë ku janë të vendosura zyrat e firmës Rosconi.

Për të fikur zjarrin kishin ardhur një numër i madh makinash zjarrfikëse nga disa qendra përreth, të cilat ia dolën që të fikin zjarrin mjaft shpejt. Por, për shkak të tymit të shumtë dhe të dendur, zjarrfikësve u është dashur që për një kohë të gjatë të pastrojnë ajrin e ndërtesës nga tymi.

Klubi në të cilin ka shpërthyer zjarri ishte hapur pak ditë më parë, gjegjësisht në fillim të shkurtit të këtij viti, shkruan azonline.ch. Dëmi i shkaktuar nga zjarri duhet të jetë disa dhjetëra mijë franga, bën të ditur policia e cila njofton po ashtu se nuk ka pasur persona të lënduar dhe as nuk ka pasur nevojë të evakuohet askush.

Mbetet i paqartë shkaku i zjarrit. Policia e Kantonit të Aargaut ka filluar hetimet për gjetjen e këtij shkaku.