Punëdhënësit ankohen për koston e “Iniciativës…”

Federata e Punëdhënësve të Zvicrës shpreh frikën se realizimi i plotë i iniciativës kundër migrimit masiv shkakton shpenzime shumë të mëdha burokratike. Sipas një studimi nga viti 2013, kostoja administrative për punësimin në Zvicër të një shtetasi të vendeve të BE-së ka qenë 25 franga. Për punësimin e një shtetasi jashtë BE-së kostoja ka qenë 500 franga.

Sipas kryetarit të federatës së përmendur Valentin Vogt, kostoja për një punësim të tillë në firmën e tij shkon deri në 2000 franga. Duke qenë se në nivel federal llogaritet të ketë 200 mijë kërkesa të tilla për punësim nga Evropa, kostoja mund të shkojë deri në 4 miliardë franga.

Madje edhe nën kushtet e uljes së kërkesave dhe nëse do të mundësohej një thjeshtëzim i theksuar i procedurës – që për Vogt është i pashmangshëm – e gjithë kjo do t`i kushtonte ekonomisë në mes 1 dhe 2 miliard franga më tepër se tash.