Cilat medikamente në Zvicër do të bëhen më të shtrenjta?

Kostoja e medikamenteve në Zvicër është tashmë më e lartë se kudo në Evropë. Dhe, tani disa barna do të bëhen edhe më të shtrenjta.

Konsumatorët zviceranë paguajnë dukshëm më shumë për barnat e tyre sesa ata në vendet fqinje evropiane, sipas të dhënave të ndryshme të publikuara ndër vite, transmeton albinfo.ch.

“Në Zvicër ne paguajmë shumë për ilaçet në krahasim me jashtë vendit”, tha për mediat zvicerane në vitin 2023 Matthias Müller, një zëdhënës i SantéSuisse, një grup ombrellë për ofruesit e sigurimeve shëndetësore zvicerane.

Madje çmimi i shumë ilaçeve gjenerike është dy herë më i lartë në Zvicër se në nëntë vende të Bashkimit Evropian, shkruan thelocal.

Për shembull, barnat gjenerike janë mesatarisht 48 për qind më të lira në Belgjikë, Danimarkë, Gjermani, Finlandë, Francë, Britani të Madhe, Holandë, Austri dhe Suedi sesa në Zvicër, sipas një krahasimi të çmimeve.

Çmimet për një numër barnash të përdorura zakonisht do të rriten edhe më tej në të ardhmen e afërt.

Zyra Federale e Shëndetit Publik (FOPH) po përshtat një model të ri për llogaritjen e marzhit të shpërndarjes. Marzhi i shpërndarjes është diferenca midis kostos së distributorit për blerjen e mallrave dhe çmimit me të cilin shiten këto mallra.

Nga 1 korriku 2024, ilaçet e lira, çmimi i fabrikës i të cilave është më i vogël ose i barabartë me 15 franga, do të bëhen më të shtrenjta.

Ky ndryshim do të prekë më shumë se gjysmën e medikamenteve që shiten aktualisht në Zvicër.

“Si rezultat i kësaj lëvizjeje, kosto shtesë prej disa qindra milionësh do t’u barten pacientëve”, sipas Intergenrika, e cila përfaqëson prodhuesit e barnave gjenerike në Zvicër.

Me pak fjalë, konsumatorët do të paguajnë çmime pak më të ulëta për ilaçet që më parë ishin më të shtrenjta, por gjithashtu do të përfundojnë duke paguar më shumë për ato që janë aktualisht më të lira.

Cilat ilaçe do të bëhen më të shtrenjta?

Ilaçet kundër dhimbjeve janë ndër ato që do të bëhen më të shtrenjta. Një prej tyre është ibuprofeni, një anti-inflamator popullor.

Ndërsa një kuti me 20 tableta 400 mg kushton sot 5,92 franga, çmimi i saj praktikisht do të dyfishohet në 11 franga nga 1 korriku.

Megjithëse kostoja e prodhimit të tij do të mbetet e njëjtë si sot – 1,58 franga – marzhi i shpërndarjes do të rritet nga 4,19 në 9,09 franga.

E njëjta gjë vlen edhe për një ilaç tjetër kundër dhimbjeve të përdorur shpesh, Ponstan. Dhjetë tableta 500 mg do të kushtojnë 11,21 franga në vend të 6,19 aktualisht.

Prodhuesi do të vazhdojë të paguajë 1,82 franga për ilaçin, por marzhi i shpërndarjes do të rritet nga 4,22 në 9,11 franga.

Madje edhe barnat gjenerike, të cilat janë më të lira – dhe shpesh shumë – do të bëhen më të shtrenjta, në kurriz të konsumatorëve.

A do të jenë disa barna më të lira?

Po, disa do të bëhen pak më të lira. Një shembull është antikoagulanti Rivaroxaban, çmimi i të cilit do të bjerë nga 281 në 267 franga.

 

---