Sulmi në Zofingen: Hetim penal ndaj 43-vjeçarit spanjoll

(KEYSTONE/Ti-Press/Pablo Gianinazzi)

Në Zofingen, Aargau, një burrë plagosi gjashtë kalimtarë, disa prej të cilëve në gjendje të rëndë. Sipas policisë kantonale të Aargaut, burri sulmoi njerëzit në mënyrë të rastësishme të mërkurën pasdite, teksa bëhet e ditur se i dyshuari është arrestuar.

Sipas zyrës së prokurorit publik Zofingen-Kulm, burri është një spanjoll 43-vjeçar. Prokuroria publike ka hapur një hetim penal ndaj personit për vrasje të shumëfishta në tentativë, transmeton albinfo.ch.

I arrestuari me sa duket ka hyrë në Zvicër vetëm pak ditë më parë, sipas prokurorisë publike. Ai gjithashtu besohet se i ka shkaktuar lëndime vetes dhe, sipas gjetjeve të mëparshme, shfaq sjellje shqetësuese psikologjike, shkruan SRF.

Ai është në gjendje të qëndrueshme fizike dhe po monitorohet nga policia, ndërsa sipas informacioneve të deritanishme, nuk ka dëshmi për sfond terrorist. Nuk dihet ende motivi i sulmit.