Bien paratë nga qielli në Cyrih: Droni lëshon 24,000 franga

Të shtunën një dron fluturoi mbi livadhin që njihet si i Kinës në Cyrih dhe papritur paratë ranë nga qielli.

Sipas raportimeve, janë hedhur gjithsej 24,000 franga zvicerane.

Hedhja ishte paralajmëruar më parë në rrjetet sociale. “Emri im është Oracle dhe të shtunën, më 11 maj do të bjerë shi para mbi Chinawiese të Cyrihut. Nuk do ta besoni? Pastaj qëndroni në shtëpi. Për të gjithë të tjerët: Fat i mirë në livadhin e Kinës”, thuhet në video, si rrjedhojë e së cilës, qindra njerëz u mblodhën më pas, transmeton albinfo.ch.

“Fillimisht humori ishte i relaksuar, shihje njerëz me çanta. Papritur erdhi dikush me maskë si nga video dhe njoftoi se një dron po vinte dhe po hidhte para. Pastaj ra shi para”, ka thënë një dëshmitar, ndërsa ka thënë se ka arritur të kapte 40 franga, raporton 20minuten.

Nuk mund të thuhet në këtë pikë nëse janë para të vërteta. Me kërkesë, policia e qytetit të Cyrihut konfirmoi një operacion në Chinawiese. Policia e qytetit ende nuk ka mundur të thotë asgjë për persona të lënduar.