Migrosi “ndëshkon” ata që blejnë jashtë Zvicrës

Herbert Bolliger, në një intervistë dhënë gazetës "SonntagsZeitung" ka deklaruar se Migrosi planifikon që në filialet e tij në afërsi të kufijve të ndërpresë punësimet e reja

Frangu i fortë dhe shkuarja e zviceranëve për të blerë matanë kufirit po u shkakton probleme të mëdha ndërmarrjeve që merren me shitje në Zvicër, veçanërisht në zonat afër kufijve. Reagimi i parë në këtë drejtim vjen nga koncerni numër një për shitje me pakicë në Zvicër, Migros.

Shefi i këtij koncerni, Herbert Bolliger, në një intervistë dhënë gazetës “SonntagsZeitung” ka deklaruar se Migrosi planifikon që në filialet e tij në afërsi të kufijve të ndërpresë punësimet e reja. Në fakt, ai ka sqaruar se në ato filiala nuk do të zëvendësohen me punëtorë të rinj ata që e lëshojnë punën (për pensionim ose arsye tjera).

Bollinger e ka arsyetuar këtë qëndrim me prognozat negative për rritje të qarkullimiit nga shkaku i daljes së zviceranëve për të blerë jashtë kufijve dhe me frangun e fortë. Sipas tij, në filialat e përmendura duhet llogaritur me ulje të qarkullimit prej së paku pesë për qind.

Veç kësaj, shefi i Migrosit ka paralajmëruar se për arsyet e njëjta, rritjet e zakonshme të pagave në gjithë Zvicrën do të jenë më të ulëta.

Ndryshimi i kursit në mes të frangut dhe euros pritet që ta zbresë për 40 deri 50 milionë franga fitimin e koncernit të madh.

Për më shumë lajme vizitoni Gazeten Shqiptare ne Internet – Albinfo.ch