Rama: Shqipëria, destinacioni më i sugjeruar nga mediet suedeze

Keystone (AP Photo/Hektor Pustina)

Shqipëria është vendosur në krye të listës së udhëtimeve të sugjeruara nga mediet suedeze “Livsstil” dhe “Dagens Nyheter”.

Kryeministri Edi Rama përcolli në rrjetet sociale shkrimet e botuara në mediet suedeze, ku i bëhet jehonë Shqipërisë si destinacion turistik.

“Nga veriu në jug, një udhëtim në të cilin të shoqërojnë rrënoja të lashta, male magjike, plazhe të bukura me rërë të imët, fshatra të rrallë dhe detet e kristalta, Shqipëria përshkruhet si një nga brigjet më piktoreske të Mesdheut”, shkruan kryeministri Rama.

Rama thekson se në tre muajt e parë të këtij viti Shqipëria është vizituar nga rreth 5000 vizitorë nga Suedia.

“Rreth 5000 vizitorë nga Suedia kemi pritur në tre muajt e parë të vitit 2024, ose 59% më shumë krahasuar me të njëjtën periudhë të vitit 2023, duke qenë një ndër tregjet me shumë potencial”, shprehet kryeministri.

“Dagens Nyheter” në shkrimin e saj përshkruan udhëtimin me traget në liqenin e Komanit, si dhe vizitat në qytetet e Shkodrës, Krujës, si dhe plazhet e Durrësit, Himarës, Vlorës, Porto Palermos, Palasës, Dhërmiut etj.

Ndërsa media tjetër suedeze “Livsstil” përshkruan qytetin e Sarandës dhe plazhet e tij të kristalta.

Mediet ndërkombëtare, në shkrimet e botuara prej tyre, vijojnë të sugjerojnë Shqipërinë si një ndër vendet që duhet vizituar.

Shqipëria arrii rekordin e 10.1 milionë turistëve në 2023-shin, duke shënuar vitin më të mirë turistik në nivel shifrash.

Shifrat e larta të vizitorëve të huaj edhe gjatë muajve të dimrit, konfirmuan trendet e shtuara për ta vizituar Shqipërinë në të gjithë muajt e vitit, një tregues pozitiv i rritjes së turizmit gjithëvjetor.

Autoritetet në vend kanë deklaruar se këtë vit presin mbi 14 milionë turistë të vizitojnë vendin.

Për shkak të vijës së gjatë bregdetare Shqipëria ofron disa plazhe, nga veriu deri në jug, si në Velipojë të Shkodrës, në Shëngjin të Lezhës, në Durrës, Vlorë, Himarë, Sarandë, etj., plazhe këto që frekuentohen përveç shqiptarëve, edhe nga shtetas të huaj, që zgjedhin Shqipërinë si një destinacion turistik gjatë muajve të verës. Gjithashtu, Gjirokastra, Berati, Butrinti, Kruja, Tirana, Shkodra, etj., janë destinacione të kërkuara për turizëm historik dhe kulturor.