Taksë rrugore unike në gjithë Evropën?

Në autostradat e Bashkimit Evropian do të mund të aplikohet një taksë rrugore e vetme, e cila do të eliminojë mundësinë e konfliktit, për shkak të futjes së të njëjtës taksë në Gjermani.

Kështu u tha në një takim të komisioneres evropiane për transport, Violeta Bulc, me ministrin gjerman të Transportit, Alexander Dobrindt, në Berlin.

Bulzi theksoi se një zgjidhje e mundshme për problemin do të ishte e pranueshme nga perspektiva evropiane.

Në të njëjtën kohë vuri në dukje se vendimi përfundimtar do të merret kur qeveria gjermane të prezantojë versionin përfundimtar të projekt-ligjit për aplikimin e taksave rrugore, që pritet në fillim të marsit.

Disa shtete anëtare kanë krtikuar gjermanët për diskriminimin e automjeteve të huaja. Ligji gjerman parashikon pagesën e taksës rrugore, vinjetës, në magjistrale për të gjithë shoferët. Por për pronarët e makinave të regjistruara në Gjermani shuma e pagesave do të kompensohet duke ulur tatimin mbi mjetet motorike. Në Bruksel shihet si diskriminim kundër shoferëve nga shtetet e tjera evropiane.

Bulzi në një intervistë më herët me gazetën “Die Welt” ka ngritur mundësinë e futjes së një takse të vetme në gjithë Bashkimin Evropian. Çmimi do të ishte në përputhje me numrin e kilometrave të kaluara, ndërsa mjetet do t’u ndahen vendeve anëtare në bazë të shrytëzimit të rrugëve të tyre.