Kurti del me deklaratë për dinarin, sqaron se si do të deponohen paratë tek serbët e Kosovës

Albin Kurti, FB

Kryeministri i Kosovës, Albin Kurti ka dalë me një deklaratë publile në lidhje me Rregulloren e Bankës Qendrore për Operacione me Para të Gatshme.

Ai thekson se mbështet plotësisht pavarësinë e Bankës Qendrore të Kosovës (BQK) dhe profesionalizmin me të cilin ajo kryen detyrat e veta.

Tutje sqarohet se kjo rregullore nuk e targeton Dinarin e Serbisë.

“Banka Qendrore ka kërkuar, me të drejtë, që transaksionet joformale që kryhen në Dinarë të Serbisë të formalizohen; prandaj, ekzistenca dhe vazhdimi i tyre kishin qenë të kundërligjshme. Monedha zyrtare e Kosovës është Euro dhe rregullorja vjen thuajse 16 vjet pas deklarimit tonë të pavarësisë”, deklaron Kurti.

Në këndvështrimin praktik, ky vendim sipas deklaratës nënkupton se pagesat e marra nga serbët e Kosovës janë ende të lejueshme, por do të deponohen në llogaritë e tyre me Euro. Natyrisht, posedimi privat i monedhave të huaja mbetet i lejueshëm.

“Meqenëse Qeveria jonë shpërndan para publike në formë të subvencioneve dhe mjeteve të tjera për mbrojtje sociale, të cilat janë marrë njëkohësisht nga komuniteti serb në llogaritë e tyre bankare në Euro, ka dëshmi të forta se këto llogari bankare kanë përdorim të gjerë. Pothuajse 35% e komunitetit serb në Kosovë marrin pensione nga Qeveria jonë në llogaritë e veta në Euro. Pensionet që marrin nga Serbia mund të transferohen në të njëjtat llogari, si plotësim dhe jo si zëvendësim të skemave ekzistuese të përfitimeve. Përveç degëve bankare zyrtare, ka 15 institucione të tjera financiare ku pensionet nga Serbia mund të ndahen, në mungesë të llogarive bankare”, sqaron Kurti.

Për më tepër bëhet e ditur se hapja dhe mirëmbajtja e llogarive të reja bankare në Euro do të jenë pa pagesë.

Megjithëse rregullorja hyri në fuqi më 1 shkurt, Kurti nënvizon se një periudhë tranzicioni është e nevojshme.

“Gjatë këtij muaji, do të sigurohemi që të japim të gjitha informacionet dhe të gjithë ndihmën e nevojshme që ky tranzicion të jetë sa më i lehtë që të jetë e mundur. Tash e tutje, zotohemi po ashtu që të promovojmë fushata të komunikimit që adresojnë këto çështje me ndjeshmërinë që e meritojnë”, thuhet tutje në deklaratë.