Më pak se 5% të kompanive globale udhëhiqen nga gratë

Ndërkaq, përqindja e grave në bordet drejtuese të kompanive është pak më e lartë. Në katër vende të botës kjo përqindje kalon shifrën 20

Sa më të mëdha që janë ndërmarrjet, kompanitë, aq më pak ka gjasa që ato të udhëhiqen nga një grua. Në më pak se 5 për qind e kompanive që zhvillojnë bizneset e tyre në nivel global kryemenaxhere janë gratë. Këto konstatime vijnë nga një raport që ka përpiluar Organizata Ndërkombëtare e Punës (ILO).

Ndërkaq, përqindja e grave në strukturat udhëheqëse, gjegjësisht në bordet drejtuese të kompanive në fjalë paraqitet më e lartë edhe pe jo e mjaftueshme. Në katër vende të botës kjo përqindje kalon shifrën 20. Bëhet fjalë për Finlandën, Britaninë e Madhe, Norvegjinë dhe Suedinë. Në Zvicër femrat përbëjnë 10 deri 20 për qind të bordeve.

Sipas raportit të përmendur të ILO-s, edhe pse gratë janë të përfaqësuara ende shumë dobët në drejtimin e kompanive, numri i femrave që bëjnë pjesë në kuadrin e mesëm dhe të lartë ka shënuar një rritje në njëzet vitet e fundit.

Zvicra, sa i përket pjesëmarrjes së gruas në menaxhim por edhe përqindjes në mesin e kuadrove nuk mund të lavdërohet shumë. Ajo në këto kategori ndan me Kinën vendin e 44-t në nivel botëror. Në të dy vendet përqindja e gruas në pozitat e larta është 33.2%. Por, megjithatë Zvicra ka shënuar një përparim të konsiderueshëm në këtë drejtim. Në vitin 2000 kishte vetëm 23.2% gra në këtë kategori.

Për të realizuar këtë raport, ILO ka shikuar strukturat drejtuese të ndërmarrjeve në 80 vende të botës.