Gjermani: 2.7 miliardë euro për armatimin e Ukrainës

(KEYSTONE/DPA/Federico Gambarini)

Gjermania është duke përgatitur pakon e re të ndihmës në armatim për Ukrainën, vlera e të cilës është 2.7 miliardë euro. Kjo është pakoja më e madhe e Berlinit për Kievin, shkruan Radio Evropa e Lirë.

“Ne shpresojmë për një përfundim të shpejtë të kësaj lufte të tmerrshme të Rusisë ndaj popullit ukrainas, por fatkeqësisht fundi nuk duket në horizont. Prandaj, Gjermania do të dërgojë ndihmën që mundet, për aq kohë sa të jetë e nevojshme”, tha ministri gjerman i Mbrojtjes, Boris Pistorius, përcjell albinfo.ch.

Paketa e re e ndihmës do të përfshijë edhe 30 tanke shtesë Lepoard, makina të blinduara të llojit Marder, sisteme të mbrojtjes ajrore dhe dronë vëzhgues. Revista Der Spiegel tha se kjo do të jetë paketa më e madhe e ndihmës që Gjermania do t’i ofrojë Ukrainës që nga nisja e luftës në fundin e shkurtit të vitit të kaluar.

Njoftimi për ndihmën e re për Ukrainën vjen në ditën kur presidenti ukrainas, Volodymyr Zelensky, po viziton Romën, ku pritet të zhvillojë bisedime me liderët politikë. Më pas ai do të shkojë në Berlin.