Gjermani: Anulohet greva e hekurudhave të Deutsche Bahn

Ilustrim

Greva 50-orëshe e thirrur për të dielën në mbrëmje është anuluar pasi sindikata dhe operatori hekurudhor Deutsche Bahn arritën në një kompromis, shkruan DW.

Një gjykatë e punës në Frankfurt konfirmoi se kishte paraqitur një propozim zgjidhjeje, për të cilin ranë dakord si sindikata e punëtorëve të hekurudhave dhe transportit, EVG dhe Deutsche Bahn.

“Në interes të kompanisë hekurudhore, klientëve dhe industrisë së saj, ne bëmë gjithçka për të shmangur këtë grevë dhe me sukses. Sigurisht, të dyja palët janë gjithmonë pjesë e një kompromisi”, tha kreu i personelit të Deutsche Bahn, Martin Seiler, përcjell albinfo.ch.

Pavarësisht anulimit të grevës, Deutsche Bahn tha se do të ketë ende vonesa për trenat rajonalë dhe në distanca të gjata, pasi kompania riplanifikon programin për rreth 50,000 shërbime treni që ishin anuluar.

Greva e planifikuar, e cila u njoftua nga EVG, pritej të ndikonte rëndë trafikun e trenave të hënën dhe të martën javën e ardhshme, shkruan DW.

EVG ka negociuar marrëveshje të reja kolektive me 50 kompani hekurudhore për 230,000 punonjës, 180,000 prej të cilëve punojnë për operatorin hekurudhor kombëtar gjerman Deutsche Bahn.