Përkundër rritjes, trafiku ajror në Zvicër, 12% më i ulët se para pandemisë

Shifrat totale janë rritur ndjeshëm krahasuar me një vit më parë, por janë ende 12 për qind nën vlerën e vitit 2019

Kompania e kontrollit të trafikut ajror Skyguide ka monitoruar dy të tretat më shumë fluturime në vitin 2022 sesa një vit më parë, transmeton albinfo.ch. Në total, më shumë se një milion fluturime janë menaxhuar dhe monitoruar, shkruan Skyguide.

Shifrat totale janë rritur ndjeshëm krahasuar me një vit më parë, por janë ende 12 për qind nën vlerën e vitit 2019, pra vitin e fundit para pandemisë.

Më shumë se 97 për qind e fluturimeve të kontrolluara janë zhvilluar në kohën e planifikuar, pa vonesa, sipas Skyguide, shkruan srf.ch. Një vit më parë, 99.2 për qind e fluturimeve ishin në kohë.

Arsyeja e rritjes së vonesave është performanca e pamjaftueshme e rrjetit pan-evropian, thuhet në njoftimin e publikuar sot nga Skyguide.

---