Gjermania deklarohet rreth dëmshpërblimit që po kërkon Polonia  

pixabay

Ministria e Jashtme Federale e Gjermanisë deklaroi sërish, në një koment mbi detajet e notës së fundit diplomatike të Polonisë për dëmshpërblimet për pushtimin e saj gjatë luftës nga Gjermania, se tema është një çështje e mbyllur për qeverinë gjermane.

Ministria e Jashtme polake tha dje në një deklaratë se ”në notën diplomatike dërguar Republikës Federale të Gjermanisë për kompensimin e dëmit të shkaktuar nga Gjermania si rezultat i agresionit dhe pushtimit të saj në 1939-1945, Republika e Polonisë kërkon kompensim për humbjet materiale dhe jomateriale që arrijnë në 1,32 trilionë euro”.

Polonia kërkon gjithashtu që ”Gjermania të kompensojë viktimat e agresionit dhe pushtimit gjerman, si dhe familjet e tyre, për humbjet dhe dëmet e pësuar” dhe ”të marrë masa sistematike për kthimin e pasurive kulturore të sekuestruara Polonisë dhe që aktualisht ndodhen në territorin gjerman”.

E pyetur nga agjencia polake e lajmeve, PAP për të komentuar detajet e notës, Ministria e Jashtme gjermane tha se “çështja e reparacioneve të luftës nga pikëpamja e qeverisë federale është e mbyllur”.

”Qëndrimi i paraqitur nga Ministrja Federale e Punëve të Jashtme, Annalena Baerbock, e mbajtur më 4 tetor në Varshavë, gjatë një konference me kreun e diplomacisë polake, Zbigniew Rau, mbetet i vlefshëm”, tha zëdhënësi i Ministrisë së Jashtme Federale.

Më 1 shtator, qeveria polake paraqiti një raport gjithëpërfshirës që detajonte humbjet materiale të pësuar nga Polonia gjatë luftës, së bashku me një zotim për të kërkuar para nga Gjermania për dëmshpërblime.