Pse në Gjermani po dështojnë konsultimet për ndihmat

Gjermani - unsplash - photo by Florian Wehde

Bëhet e ditur se Qeveria federale dhe ato të landeve nuk kanë arritur ende një konsensus për financimin e kostove për lehtësime për qytetarët dhe kompanitë për shkak të çmimeve të larta të energjisë, përcjell albinfo.ch.

Pas një takimi të mbajtur, nuk është arritur ndonjë përparim rreth çështjes së financimit të ndihmave të shumta për qytetarët. Prandaj, kryeministrat e landeve theksuan se janë të zhgënjyer me rezultatet e arritura deri tani.

“Qeveria federale ka treguar pak gatishmëri për të bërë kompromis për çështje thelbësore”, tha kryeministri i Nordrhein-Westfalen, Hendrik Wüst (CDU) pas konsultimeve të djeshme në Berlin. Ai shtoi se ende ka shumë pyetje pa përgjigje, siç janë ato të kostove të energjisë për spitale, kostove për biletat e autobusëve dhe trenave, por edhe financimi i refugjatëve.

Kancelari gjerman, Olaf Scholz, theksoi se paketat e mëparshme të ndihmës dhe fondi special i planifikuar tani do të kenë një vëllim total nga 295 miliardë euro. “Qeveria federale do të marrë përsipër dhe do të financojë gati 240 deri 250 miliardë euro nga kjo shumë,” tha Scholz.

Konsultimet do të vazhdojnë pas dy javësh. Debati mes Qeverisë federale dhe atyre të landeve rreth ndihmave për qytetarët vazhdon nga mesi i tetorit.