Detaje të tjera nga sulmi në Mal të Zi

Televizioni publik i Malit të Zi TVCG mëson nga burimet e saj brenda policisë se burri kishte shtënë me armë mbi civilët dhe zyrtarët policorë.

Sipas informacioneve të këtij televizioni, 34-vjeçari qëlloi për vdekje 11 persona, ku më pas ndërhyri policia duke e qëlluar autorin e sulmit për vdekje.

Një pjesë e qytetit Cetinje në Mal të Zi është bllokuar, është shtuar prezenca policore dhe një numër i madh i qytetarëve janë mbledhur rrugëve për të mësuar për fatin e më të dashurve të tyre, përcjell albinfo.ch.

Nga dëshmitarët e rastit thuhet se sulmuesi kishte shëtitur tërë lagjen dhe më pas kishte filluar të shtie mbi qytetarët që hasnin në të.

Mësohet se në mesin e gjashtë të plagosurve është edhe një zyrtar policor, ndërsa mediat e Malit të Zi raportojnë se kishte ndodhur një konflikt familjar, që besohet se i kishte paraprirë këtij sulmi.