Paraqitet rasti i parë i lisë së majmunit në Zvicër

Fjala është për një rast në kantonin e Bernës, siç ka njoftuar të shtunën (sot) departamenti kantonal i shëndetësisë

Përfaqësuesit e ministrive të shëndetësisë në Evropë dhe Amerikën e Veriut janë aktualisht shumë të sensibilizuar lidhur me një sëmundje infektive virale që është shfaqur shpesh në vende të ndryshme: bëhet fjalë për të ashtuquajturën lija e majmunëve.

Kjo sëmundje herë pas here shkakton shpërthime në kontinentin afrikan, por rastet jashtë Afrikës janë raportuar rrallë, transmeton albinfo.ch. Edhe kur kanë ndodhur, ato janë konstatuar gjithmonë te njerëzit që kishin udhëtuar nga rajonet e prekura të Afrikës.

Këtë javë, Spanja dhe Portugalia kanë raportuar dhjetëra raste të reja të dyshuara, shkruan srf.ch. Gjithashtu, raste të lisë së majmunëve janë regjistruar në Gjermani, Itali, Britani të Madhe, Suedi, Kanada dhe SHBA.

Dhe tani Zvicra po raporton gjithashtu një rast të parë: Fjala është për një rast në kantonin e Bernës, siç ka njoftuar të shtunën (sot) departamenti kantonal i shëndetësisë.

Rasti është raportuar të premten dhe është konfirmuar pas analizave laboratorike, transmeton albinfo.ch. Shërbimi mjekësor kantonal ka filluar gjurmimin e kontakteve në mënyrë që të mund të kuptojë zinxhirët e mundshëm të infeksionit, thuhet në një deklaratë të bërë nga departamenti i shëndetësisë, ai social dhe  i integrimit, i kantonit të Bernës.

Personi në fjalë mendohet se ka rënë në kontakt me virusin jashtë vendit, u tha. I sëmuri ndodhet në mjekim ambulator dhe është i izoluar në shtëpi. Të gjithë personat e kontaktit janë informuar me gjurmimin e kontaktit.

Çfarë është lija e majmunit

Sëmundja virale e kafshëve – me sa duket veçanërisht e brejtësve – transmetohen edhe te njerëzit (e ashtuquajtura zoonozë). Virusi i lisë së majmunit (orthopoxvirus) konsiderohet të jetë mesatarisht i transmetueshëm te njerëzit. Transmetimi nga njeriu te njeriu është i rrallë, por i mundshëm me kontakt të ngushtë.

Sipas BAG, meshkujt që bëjnë seks me meshkuj duket se kanë një rrezik shtesë për t’u infektuar.

Lija e majmunit transmetohet nëpërmjet pikave të mëdha dhe nëpërmjet kontaktit të ngushtë me njerëzit ose kafshët e infektuara, përcjell albinfo.ch. Kontakti me sekrecione apo gjak të infektuar mund të çojë edhe në transmetim, siç shkruan BAG.

BAG jep informacionet përkatëse

BAG po vëzhgon situatën “nga afër”, thuhet në faqen e dedikuar posaçërisht për linë e majmunëve. Kjo bëhet në koordinim me OBSH-në dhe Qendrën Evropiane për Parandalimin dhe Kontrollin e Sëmundjeve (ECDC).

Megjithatë, toni është qetësues, përcjell albinfo.ch BAG thekson se virusi i lisë së majmunit (ortopoxvirus) konsiderohet të jetë mesatarisht i transmetueshëm te njerëzit. Sëmundja është gjithashtu zakonisht e lehtë dhe shumica e të prekurve shërohen brenda disa javësh. Me sa duket, njerëzit me imunitet të dobët, si dhe fëmijët dhe të rinjtë janë në rrezik për një ecuri më të rëndë.

---