Rriten qiratë në qytetet më të mëdha zvicerane

(KEYSTONE/Gaetan Bally)

Cyrihu dhe Gjeneva janë dy qytetet më të shtrenjta në Zvicër për marrjen me qira të shtëpive, me çmime që vazhdojnë të rriten ndërsa njerëzit lëvizin nga qytetet më të vogla në qytetet e mëdha, përcjell albinfo.ch.

Ndërsa Gjeneva është vendi më i shtrenjtë për të marrë me qira apartamente të mëdha familjare – një apartament me 4,5 dhoma prej 90-120 metra katrorë kushton 3,500 CHF – Cyrihu është më i shtrenjti për apartamentet me dy dhoma (1,650 CHF në muaj), sipas një raporti të hënën nga comparis.ch, një faqe interneti për krahasimin e çmimeve.

Dallimi mund të shpjegohet nga numri i njerëzve që jetojnë vetëm.

“Përderisa kjo ka rënë në Gjenevë në vitet e kaluara, është rritur në Cyrih”, tha Leo Hug i comparis.ch.

Raporti, i cili analizoi ndryshimet në qiratë në dhjetë qytetet më të mëdha zvicerane gjatë pesë vjetëve të fundit, vuri në dukje gjithashtu se rritja e çmimit të apartamenteve të mesme dhe të mëdha ishte më e madhja në Gjenevë: që nga viti 2017, apartamentet me 4.5 dhoma u rritën me 4.2% në 3,500 CHF, ndërsa banesat me 3,5 dhoma u rritën me 9,5% në 2,640 CHF.

Lucerni në Zvicrën qendrore pa rritjen më të madhe kur bëhej fjalë për njësitë me dy dhoma, çmimi mesatar i të cilave u rrit me 4.8% në 1,300 CHF në muaj.

Më lirë në Lugano

Megjithatë, në përgjithësi, tabloja është e një stabiliteti relativ, me shumë nga dhjetë qytetet që nuk tregojnë ndryshim ose madje edhe ulje të çmimeve të qirasë. Në Lugano në Zvicrën jugore qiraja për një apartament me 4,5 dhoma ra nga 1,900 CHF në 1,700 CHF – më pak se gjysma e çmimit si në Gjenevë.

Ndërkombëtarisht, Cyrihu dhe Gjeneva shfaqen rregullisht në listat e qyteteve më të shtrenjta në botë, përcjell tutje albinfo.ch.