Vjena, qyteti më i dekoruar në Evropë për Vitin e Ri

Jemi thuajse në prag të Vitit të Ri! Në të gjithë Evropën, dritat e Krishtlindjeve ndriçojnë në mënyrë festive rrugët

Më poshtë janë 10 qytetet e dekoruara më bukur dhe madje do të shkojmë edhe në selinë qendrore të Babagjyshit!, shkruan Monitor, transmeton albinfo.ch.

Vjenë, Austri

Që nga 12 nëntori, rrugët dhe sheshet e Vjenës janë ndriçuar me dritat festive. Këtu mund të shihni dritat e Krishtlindjeve përgjatë Vienna Graben, një rrugë shumë e populluar për shoping. Të paktën njerëzit që janë vaksinuar ose janë shëruar nga infektimi me COVID mund të shijojnë atmosferën festive – për ta, kufizimi përfundoi të dielën e 3-të të Adventit.

Pragë, Republika Çeke

Një bredh i madh, i dekoruar në mënyrë festive zbukuron qendrën e Pragës – edhe pse tradicionalisht, ato nuk dekorohen deri në mëngjesin e pragut të Krishtlindjeve. Tregje të shumta të Krishtlindjeve mbulojnë qytetin, duke ftuar klientët të provojnë trdelník, një pastë me arra e mbuluar me sheqer pluhur.

Kopenhagën, Danimarkë

Parku argëtues me famë botërore Tivoli tërheq vizitorë nga e gjithë bota në çdo kohë të vitit. Megjithatë, në periudhën e Krishtlindjeve, atmosfera këtu bëhet jashtëzakonisht e veçantë. I gjithë parku është i dekoruar për Krishtlindje dhe ka shumë drita. Sigurisht, edhe Babagjyshi së bashku me renët e tij viziton tregun e madh të Krishtlindjeve.

Palma, Spanjë

Majorca, ishulli më popullor i pushimeve për gjermanët, mbulohet me shkëlqimin e periudhës para Krishtlindjeve: zbukurimi kryesor është pema e Krishtlindjeve 27 metra e lartë përpara Katedrales Palma. Rreth 4,200 elemente vezulluese dhe mbi 415 kilometra vargje dritash ndriçojnë kryeqytetin e ishullit. Është e bukur, por edhe shumë e shtrenjtë: spektakli vezullues kushton afro 1,5 milionë euro.

Bazel, Zvicër

Çdo vit, qindra tezga dhe drita të panumërta e bëjnë Bazelin një nga qytetet më të bukura të Krishtlindjeve në Evropë. Sidomos qendra piktoreske e qytetit të vjetër – si Barfüsserplatz – shkëlqen në këtë atmosferë festive. Dyqane të panumërta tërheqin turistët dhe vendasit për të blerë dhurata të bukura. Megjithatë, për shkak të pandemisë, hyrja në Tregun e Krishtlindjeve lejohet vetëm me një pasaportë të vlefshme COVID.

Londër, Mbretëria e Bashkuar

Si çdo vit, një pemë norvegjeze e Krishtlindjeve shkëlqen në sheshin Trafalgar në Londër. Bredhi është një dhuratë nga qyteti i Oslos në shenjë mirënjohjeje për mbështetjen britanike gjatë pushtimit nga Gjermania naziste në Luftën e Dytë Botërore. Por për shumicën e kalimtarëve, është ndoshta vetëm një nga shumë pjesët e kryeqytetit të dekoruara shumë bukur për Krishtlindje.

Bruksel, Belgjikë

Kryeqyteti belg bëhet një vend i mrekullueshëm me shumë ngjyra kur Grand-Place dhe sheshet e tjera të qytetit organizojnë tregjet e Krishtlindjeve. Disa qindra shtëpiza të vogla prej druri dhe mijëra drita krijojnë një atmosferë festive. Nëse doni të largoheni nga zhurma për disa minuta, mund të bëni disa rrotullime në rrotën e Ferrisit.

Rovaniemi, Finlandë

Në fund, le të hedhim një vështrim në Rovaniemin e mbushur me dëborë të Finlandës, i njohur si “fshati i Babagjyshit”. Natyrisht, në këtë periudhë ka shumë njerëz këtu. Turistët mund ta shijojnë eksperiencën e tyre këtu duke bërë një shëtitje nëpër Rrethin Arktik, i cili përshkon fshatin dhe është i mbushur me shtëpiza të ndriҫuara – që gjithashtu ndihmojnë Babagjyshin të gjejë rrugën e kthimit për në shtëpi, hohoho! Me këtë frymë, le t’ju urojmë një Vit të Ri të gëzuar!

---