Kurti: Dialogu me Serbinë nuk është në mesin e tri prioriteteve

Kryeministri i Kosovës, Albin Kurti, ka thënë se marrëdhëniet me Serbinë janë të rëndësishme, por se “Kosova është një vend i pavarur” në të cilin tema e dialogut me Serbinë nuk është ndër tri prioritetet kryesore, përcjell albinfo.ch.

Në një intervistë për Al Jazeera, Kurti shtoi se ai nuk tha se dialogu do të injorohej plotësisht, por se nëse i pyet qytetarët e Kosovës, dialogu me Serbinë është në vendin e gjashtë ose të shtatë në listën e 10 prioriteteve.

“Mendimi im ishte se ne duhet të bëjmë një koncesion dhe ta vendosim atë në vendin e katërt. Nuk mund të jetë ndër tre prioritetet kryesore, sepse ne nuk mund ta trajtojmë në atë mënyrë, dhe qytetarët e dinin se çfarë po bënin kur votuan për ne dhe na kthyen në detyrë”, u shpreh Kurti.

Sipas tij, Serbia po “imiton Federatën Ruse dhe, duke forcuar para-shtetet satelitore, dëshiron t’i paraqesë fqinjët e saj si jofunksionalë dhe t’i kthejë ata në shtete të dështuara”.

“Republika e Kosovës nuk do ta lejojë këtë, një Kosovë e pavarur mbetet këtu dhe është më e fortë si shtet me institucione funksionale, e cila po del nga kriza ekonomike dhe po përparon drejt Perëndimit. Ne kurrë nuk dyshuam në këtë, qëllimi ynë është të anëtarësohemi në NATO dhe BE”, tha Kurti për Al Jazeera.