Zviceranët i thanë Jo ligjit për CO2

Marrë në tërësi, kundër Ligjit për CO2 kanë votuar qytetarët e zonave rurale bdërsa pro, ata të zonave urbane

Zviceranët me të drejtë vote, sot, në ditën e referendumeve, duke votuar për pesë iniciativa të ndryshme federale, kryesisht kanë ndjekur qëndrimet e Këshillit Federal. Vetëm Ligji për  CO2 është hedhur poshtë, në kundërshtim me rekomandimin e Këshillit Federal.

Këto janë rezultatet e votimeve të sotme në nivel vendi:

Iniciativa për ujë të pijshëm u refuzua qartë me 60.9 për qind kundër. Pra, sipas këtoj vendimi të sovranit, pesticidet sintetike do të vazhdojnë të lejohen në bujqësi.

Nisma e pesticideve gjithashtu ka marrë një kundërshtim nga votuesit sot. 60.7 për qind e tyre janë shprehur kundër saj, transmeton albinfo.ch.

Po ashtu Këshilli Federal ka marrë mbështetje me miratimin e Aktit Covid-19. 60 për qind kanë votuar pro, në kutinë e votimit.

Ndërkaq Ligji për CO2 i mbështetur nga Këshilltarja Federale Simonetta Sommaruga është refuzuar me rezultat relativisht të ngushtë. Thjesht,  51.8 për qind nuk kanë dasshur të pranojnë ligjin e rishikuar.

Ky refuzim sipas mediave zvicerane është një “shuplakë e fortë” në fytyrëne Këshillit Federal dhe sidomos ministres Sommaruga.  Po kështu, mosvotimi i kësaj nisme gjykohet si një barrierë që pengon shumë Zvicrën në përmbushjen e parametrave të kërkuar për mbrojtjen e ambientit.

Ligji federal për masat policore për të luftuar terrorizmin, i cili është mbështetur fuqimisht nga Këshilltarja Federale Karin Keller-Sutter, është miratuar me 56.6 për qind vota Pro.

Kantoni i Cyrihut dhe zonat urbane votojnë pro Ligjit për CO2

55.4 për qind të votuesve në Kantonin e Cyrihut janë shprehur në favor të ligjit CO2 në kanton. Rezultatet tani dihen nga të gjitha kantonet.

Marrë në tërësi, kundër Ligjit për CO2 kanë votuar qytetarët e zonave rurale ndërsa pro, ata të zonave urbane.

---