Pushim 1-javor për nxënësit në Kosovë

Për shkak të numrit të rritjes së rasteve është vendosur që të pushohet për një javë

Ministria e Arsimit e Kosovës caktoi për javën e ardhshme pushimin pranveror të nxënësve të nivelit parauniversitar.

Ministrja Arbërie Nagavci tha në një postim në Facebook se pushimi pranveror do të fillojë më 6 prill, 2021, dhe do të përfundojë më 8 prill, 2021.

Datat 5 dhe 9 prill janë festa në Kosovë, andaj i bie që pushimi pranveror të zgjasë një javë të plotë, raportojnë mediat vendore, përcjell albinfo.ch.

Mësimi në arsimin parauniversitar do të vazhdojë nga data 12 prill, 2021.

Nagavci tha se vendimi për pushimin është marrë me rekomandimin e Institutit Kombëtar të Shëndetësisë Publike të Kosovës.

Kosova, javëve të fundit, po përballet me raste në rritje të të infektuarve me koronavirus.

Të mërkurën, autoritetet shëndetësore raportuan për 923 raste të reja pozitive, që është shifra më e lartë ditore e raportuar në këtë vit.

---